मन्त्रको जप र ध्यानले क्यान्सर राेक्छ ? 

सामाजिक संजालमा स्वास्थ्य सम्बन्धी एउटा दाबीसहितको सामग्री फेला परेकाे छ । क्यान्सर भइसकेको अवस्थामा मन्त्रको जप गर्दा क्यान्सर बढ्नबाट रोक्ने दाबी उक्त सामग्रीमा गरिएको छ ।

डा.राम बहादुर बोहरा नामक टिकटक आइडीमा पोस्ट गरिएको सामग्रीमा एउटा ध्यान संगीत सुन्न सकिन्छ । उक्त सामग्रीमा एउटा थमनेलसमेत देखिन्छ । थमनेलमा लेखिएको छ– ‘‘ओम नम: शिवाय शंभवे कर्केशाय नमो नम:’ क्यान्सर भइसकेको अवस्थामा यो मन्त्र पढ्नाले क्यान्सर बढ्नबाट रोक्छ । औषधी सेवन कालमा नियमित यो मन्त्र जप्ने गर्नुहोस् ।’

दाबीसहितको प्रस्तुत सामग्रीमा क्यान्सर भइसकेको अवस्थामा ‘ओम नम: शिवाय शंभवे कर्केशाय नमो नम:’ मन्त्रको जप गर्दा क्यान्सर बढ्नबाट रोक्ने दाबी गरिएको छ । मानव स्वास्थ्य जस्तो गम्भिर विषयसँग सम्बन्धित रहेकाले हामीले प्रस्तुत सामग्रीमाथि तथ्यजाँच गरेका हौँ ।

तथ्यजाँच/प्रमाणीकरण

मन्त्रको जप वा ध्यानले क्यान्सर एवं अन्य कुनै पनि रोगलाई निको पार्नसक्ने कुनै प्रमाण भेटिँदैन ।

क्यान्सर भएका व्यक्तिहरूले सहज महसुस गर्न ध्यान गर्ने गरेको Cancerresearchuk.org वेबसाइटले जानकारी दिएकाे छ । वेबसाइटका अनुसार ध्यानले चिन्ता र तनाव कम गर्न सक्छ । साथै नियमित ध्यान गर्नाले दुखाइ, सुत्न कठिनाई, थकान, बिरामी महसुस र उच्च रक्तचापबाट छुटकारा पाउन सकिन्छ । 

क्यान्सर अनियन्त्रित कोशिकाको बृद्धिको कारणले हुने रोग हो, जसले शरीरको प्रभावित अंगलाई बिगार्छ र त्यो बिगार अन्य क्षेत्रमा समेत फैलिन्छ ।

ध्यान तनाव कम गर्ने एउटा सरल तरिका हो । यदि तनावका कारण मानिस चिन्तित छ भने ध्यान गर्नु उपयुक्त हुन्छ । ध्यानमा केही मिनेट खर्च गर्दा पनि मानिसलाई आन्तरिकरुपमा शान्त तुल्याउँछ । 

तनाव पनि अप्रत्यक्ष रूपमा क्यान्सरसँग सम्बन्धित रहेको Cancer.gov वेबसाइटमा उल्लेख गरिएको छ । उदाहरणका लागि दीर्घकालीन तनावमा रहेका व्यक्तिहरूले केही अस्वास्थ्यकर व्यवहारहरू विकास गर्ने गर्दछन्, जस्तै धुम्रपान, धेरै खाने, कम सक्रिय हुने वा रक्सी पिउने । यी व्यवहारहरू आफैंमा क्यान्सरहरूको बढ्दो जोखिमसँग सम्बन्धित छन् ।

निष्कर्ष

मन्त्रको जप वा ध्यानले क्यान्सरलाई रोकेको कुनै प्रमाण भेटिँदैन ।

नतिजा : भ्रामक

हाम्रा स्रोतहरू 

Cancerresearchuk

cancer.gov

(This article is published in collaboration with THIP Media)

तपाईँले थाहा पाउनु भएको कुनै शंकास्पद खबर वा सूचनाबारे अनुसन्धान, खोज वा अन्य सुझावको लागि हामीलाई ‌सम्पर्क गर्ने इमेल ठेगाना हो: [email protected]