दाबी: परम्परागत एवं घरेलु उपचार विधि र आहारको सेवनबाट प्रोस्टेटको समस्या निको पार्न सकिन्छ ।
तथ्य: प्रोस्टेट समस्याहरूको लागि इजाजतपत्र प्राप्त स्वास्थ्य सेवा प्रदायकद्वारा उचित चिकित्सा मूल्याङ्कन, निदान र उपचार आवश्यक पर्दछ । उल्लेखित उपचार विधिहरु प्रोस्टेट समस्या निको पार्न वैज्ञानिक रूपमा प्रमाणित गरिएका छैनन् ।
सामाजिक संजालमा मानव स्वास्थ्यसँग सम्बन्धित एउटा दाबीसहितको सामग्री फेला परेको छ । उक्त सामग्रीमा विभिन्न परम्परागत एवं घरेलु उपचार विधि अपनाएर प्रोस्टेट रोग निको पार्न सकिने दाबी गरिएको छ ।
Stha Min नामक फेसबुक आइडीमा प्रोस्टेट रोगको सांकेतिर तस्बिरसहित परम्परागत एवं घरेलु उपचार विधि उल्लेख गरिएको छ । प्रोस्टेटको लागि घरेलु उपचार भन्दै १३ बुँदामा यस्तो लेखिएको छ:
१) बसेर पानी खाने, बसेर पिशाब गर्ने ।
२)प्रत्येक पटक पिशाब गरेपछि या दिनमा ४/५ पटक मेहन स्नान ( इन्द्रियस्नान ) गर्ने ।
३) ४ वटा छुहारा (छोहडा/छोकडा) राती पानीमा पकाएर खाने ।
४) दिनमा ५०-६० ग्राम जति सुख्खा फल (किस्मिस,ओखर, बदाम, अन्जिर आदि) खाने ।
५) माछा, मासु, अण्डा नखाने ।
६) रसाहार/फलाहार/जलाहार अधिक गर्ने ।
७) गहुँ र बेसन बाट बनेका परिकार न खाने ।
८) उच्च प्रोटिनयुक्त भोजन अधिक नखाने, खाए पनि कम र बिहानको समयमा मात्र खाने।
९) सूर्यास्त पछि कुनै पनि प्रकारका प्रोटीन पाइने भोजन नखाने ।
१०) अश्विनी मुद्रा गर्ने।
११) प्राकृतिक आहार-विहारको नियम अपनाउने ।
१२) इन्द्रासन अर्क र इन्द्रासन घनवटीको सेवन गर्ने ।
१३) दैनिक २ पटक ५ ग्राम इमली (अमेल्ची) को काढा सेवन गर्ने ।
प्रस्तुत सामाजिक संजाल पोस्टमा परम्परागत तथा घरेलु उपचारहरु र किसमिस, ओखर र बदाम लगायतको सेवनले प्रोस्टेट रोग निको दाबी गरिएको छ । तथ्यजाँचका क्रममा हामीले उक्त दाबी गलत रहेको पायौँ ।
तथ्यजाँच/प्रमाणीकरण
माथि उल्लेखित दाबीको सूचीमा रहेका विभिन्न घरेलु उपचार विधि तथा खानेकुराले प्रोस्टेट स्वास्थ्यको लागि सम्भावित रूपमा लाभहरु प्रदान गर्न सक्छन् । तर, यी उपचार विधिहरु प्रोस्टेट समस्या निको पार्न वैज्ञानिक रूपमा प्रमाणित गरिएका छैनन् । आहारले समग्र स्वास्थ्यमा योगदान दिन सक्छन् र सम्भावित रूपमा प्रोस्टेट स्वास्थ्यलाई पनि लाभ दिन सक्छन् । तर, यी अभ्यास र आहारलाई प्रोस्टेट समस्याहरूको लागि स्ट्यान्डअलोन उपचार मान्न सकिँदैन ।
प्रोस्टेट पुरुष प्रजनन प्रणालीमा रहेको एक ग्रन्थी हो, जो मूत्राशयको तलतिर रहेको हुन्छ । वीर्य उत्पादनमा सहयोग तथा मूत्रमार्गलाई घेरेर राख्ने यस ग्रन्थीले तरल पदार्थ उत्पादन गर्ने गर्दछ । पुरुषको उमेर बढ्दै जाँदा प्रोस्टेट (BPH) बढ्न सक्छ, जसले पिसाबसम्बन्धी समस्याहरू निम्त्याउँछ । साथै यसबाट प्रोस्टेटाइटिस (सूजन) वा प्रोस्टेट क्यान्सर पनि निम्तिन सक्छ । प्रोस्टेट स्वास्थ्य निगरानीको लागि नियमित जाँचहरू गर्न आवश्यक छ ।
माथि उल्लेखित दाबीसहितका बुँदाहरुलाई यहाँ सूचीवद्ध रुपमा तथ्यजाँच गरिएको छ ।
- बसेर पानी खाने, बसेर पिशाब गर्ने: यो विधि प्रोस्टेट समस्याको उपचार हो भन्ने कुनै प्रमाणले देखाएको छैन ।
- प्रत्येक पटक पिशाब गरेपछि या दिनमा ४/५ पटक मेहन स्नान ( इन्द्रियस्नान ) गर्ने: पिसाब पछि बारम्बार नुहाउँदा प्रोस्टेट समस्या निको हुन्छ भन्ने धारणालाई समर्थन गर्ने कुनै वैज्ञानिक प्रमाण छैन ।
- ४ वटा छुहारा (छोहडा/छोकडा) राती पानीमा पकाएर खाने : छोहडा/छोकडामा पौष्टिक हुन्छन् तर यसले प्रोस्टेट समस्याहरूलाई विशेष रूपमा निको पार्छ भन्ने कुनै प्रत्यक्ष प्रमाण छैन ।
- सुक्खा फल खानुः बदाम, ओखर र किसमिस जस्ता नटमा फाइदाजनक पोषक तत्व पाइन्छ तर यसले प्रोस्टेटको समस्या आफैं निको गर्दैन।
- माछा, मासु र अण्डा जस्ता खानेकुरा नखाने: आहार परिवर्तनले समग्र स्वास्थ्यलाई असर गर्न सक्छ तर यी खानेकुराहरु नखाएपछि प्रोस्टेट निको पार्ने कुनै प्रत्यक्ष प्रमाण छैन ।
- धेरै तरकारी/फलफूल/पानी खाने: यी खानेकुराहरू सहित सन्तुलित आहार सामान्यतया समग्र स्वास्थ्यको लागि राम्रो हुन्छ तर प्रोस्टेट समस्याहरू सीधै निको हुँदैन ।
- गहुँ र चनाबाट बनेका परिकारहरू बेवास्ता गर्ने: यी खानेकुराहरू बेवास्ता गर्दा मात्र प्रोस्टेट समस्याहरू निको हुन्छ भन्ने दावीलाई समर्थन गर्ने कुनै वैज्ञानिक प्रमाण छैन ।
- बिहान उच्च प्रोटिनयुक्त खाना खाने र सूर्यास्त पछि प्रोटिनयुक्त खानेकुरा नखाने: खानाको समयले पाचनमा असर पार्न सक्छ तर यो प्रोस्टेट समस्याहरूको लागि प्रमाणित उपचार होइन ।
- अश्विनी मुद्रा प्रदर्शन: यो एक योग अभ्यास हो जसको विभिन्न फाइदा हुन सक्छ तर प्रोस्टेट समस्याहरू निको पार्न यसको प्रत्यक्ष प्रभावबारे वैज्ञानिक प्रमाणको खाँचो छ ।
निष्कर्ष
प्रोस्टेट समस्याहरूका लागि इजाजतपत्र प्राप्त स्वास्थ्य सेवा प्रदायकद्वारा उचित चिकित्सा मूल्याङ्कन, निदान र उपचार आवश्यक पर्दछ । घरेलु उपचार वा अप्रमाणित जानकारीमा मात्र भर पर्दा अन्तर्निहित समस्या समाधान नहुन सक्छन् र आवश्यक चिकित्सा उपचारमा ढिलाई हुनसक्छ ।
नतिजा : आंशिक गलत
हाम्रा स्रोतहरू
प्रोटेस्ट जानकारी, ncbi.nlm.nih.gov
जानकारी, dates.business
जानकारी, prostatecanceruk.org
जानकारी, ayurveda-foryou.com
(This article is published in collaboration with THIP Media)
तपाईँले थाहा पाउनु भएको कुनै शंकास्पद खबर वा सूचनाबारे अनुसन्धान, खोज वा अन्य सुझावको लागि हामीलाई सम्पर्क गर्ने इमेल ठेगाना हो: checkthis@newschecker.co
