Fact Check: प्रधानमन्त्रीको तस्बिर जोडेर गरियो भ्रामक दाबी

दाबी: आइएमइ लुटेर भाग्दैगर्दा एमाले नेता पक्राउ परेको, पार्टी नेताको आदेशमा लुटपाट गरिएको र म​हेश ब​स्नेत, गोकुल बास्कोटा लगायतका नेताले आरोपीलाई हिरा गर्न माग गरेको दाबी ।
तथ्य:  जेठ २०८१ मा सुनसरीमा भएको पक्राउको घटनालाई भ्रामक तरिकाले प्रधानमन्त्री केपी शर्मा ओली र उनको पार्टीसँग जोड्दै सामाजिक संजालमा फैलाइएको छ ।

सत्तारुढ दल नेकपा (एमाले) र नेताहरुसँग सम्बन्धित एउटा सामग्री सामाजिक संजालमा फैलाइएको छ । उक्त सामग्रीमा आइएमइ लुटेर भाग्दैगर्दा एमाले नेता पक्राउ परेको, पार्टी नेताको आदेशमा लुटपाट गरिएको र म​हेश ब​स्नेत, गोकुल बास्कोटा लगायतका नेताले आरोपीलाई हिरा गर्न माग गरेको दाबी गरिएको छ । 

subedi sun 9999 नामक टिकटक आइडीमा पोस्ट गरिएको सामग्रीमा प्रधानमन्त्री एवं नेकपा एमालेका अध्यक्ष केपी शर्मा ओलीको तस्बिर जोडिएको छ । साथै उक्त सामग्रीमा प्रहरीको गिरफ्तमा रहेका एक अभियुक्तलाई देख्न सकिन्छ ।

प्रस्तुत तस्बिरको क्याप्सनमा लेखिएको छ- ‘मोरङ बिराटनगरमा आज दिउँसो IME बैँक लुटेर भाग्दै गर्दा एक एमाले नेतालाई प्रहरीले पैसासहित पक्राउ गरेको छ, पक्राउ पर्ने बिराटनगर महानगर सेक्रेटरी रहेको प्रहरीले जनाएको । उनको बयान अनुसार केपीको आदेसमा पार्टीको खर्चको लागि यो काम गरेको हुँ भनेर बयान दिएका छन् । निज छुटाउन म​हेश ब​स्नेत, गोकुल बास्कोटा लगायतका नेताले प्रहरीलाई रिहाई गर्न माग गरेको छन्, यदि रिहाइ नभए प्र​ह​रिलाई कुट्ने ध​म्की दिएका छ​न् ।’

प्रस्तुत दाबीसहितको सामग्री सामाजिक संजालमा द्रुत गतिमा फैलिरहेको छ । एक साताअघि मात्रै पोस्ट गरिएको सामग्रीलाई साढे ५ हजारभन्दा बढी टिकटक प्रयोगकर्ताले रियाक्ट गरिसकेका छन् भने यही समयमा दाबीसहितको सामग्रीलाई १ हजारभन्दा बढी पटक सेयर भइसकेको छ ।

त्यस्तै सोही दाबीलाई Shakti Man Thing नामक फेसबुक आइडीबाट विभिन्न ग्रुपहरुमा पोस्ट गरिएको पाइयो । दाबीसहिको सामग्रीलाई केही दिनमै साढे २ सयभन्दा बढी पटक सेयर गरिएको देखिन्छ । 

के आइएमइ लुटेर भाग्दैगर्दा एमाले नेता पक्राउ परेको भन्दै पोस्ट गरिएको तस्बिर सत्य हो त? वास्तविकता पत्ता लगाउन हामीले तथ्यजाँच गरेका छौँ । 

तथ्यजाँच/प्रमाणीकरण

प्रधानमन्त्री केपी शर्मा ओलीको तस्बिर र दाबीसँग जोडिएको दृश्य महत्वपूर्ण छ । त्यसैले हामीले उक्त तस्बिरको स्क्रिनसटलाई गुगल लेन्समा इभर्स इमेज सर्च गर्‍यौँ । जाँचको नतिजास्वरुप himalkhabar.com मा प्रकाशित एक वर्ष पुरानो समाचार फेला पर्‍यो ।  

२० जेठ २०८१ मा प्रकाशित समाचारमा सुनसरीको हरिनगर गाउँपालिका-५, दुर्गा मन्दिर नजिकबाट स्रोत नखुलेको १ करोड १ लाख रुपैयाँसहित प्रहरीले ३७ वर्षीय इसा अन्सारीलाई पक्राउ गरेको जानकारी उल्लेख गरिएको छ । समाचार अनुसार सशस्त्र प्रहरी बल, नेपाल बोर्डर आउटपोस्ट वसन्तपुरको चेकपोइन्ट टोलीले घुस्की नाकामा सुरक्षा जाँचका क्रममा हरिनगर-५ का ३७ वर्षीय अन्सारीलाई पक्राउ गरेको थियो ।

प्रस्तुत समाचारसँगै उल्लेख गरिएको तस्बिरलाई सत्तारुढ नेकपा एमाले र एमालेका नेताहरुसँग जोडिएको छ । तर, घटनामा नेकपा एमाले र एमालेका नेताहरुको नाम जोडिएको प्रमाण फेला परेन ।

अर्कोतर्फ english.khabarhub.com मा पनि सोही तस्बिर र समाचार प्रकाशित गरिएको देखियो । २ जुन २०२४ मा प्रकाशित समाचारमा एमाले र एमालेका कुनैपनि नेताको नाम जोडिएको छैन ।

अर्कोतर्फ जाँचका क्रममा बिराटनगरको आइएमइ लुटेर भाग्दैगर्दा एमाले नेता पक्राउ परेको, पार्टी नेताको आदेशमा लुटपाट गरिएको र म​हेश ब​स्नेत, गोकुल बास्कोटा लगायतका नेताले आरोपीलाई हिरा गर्न माग गरेको दाबीलाई प्रमाणित गर्ने कुनैपनि तथ्यप्रमाण फेला परेनन् । 

निष्कर्ष

आइएमइ लुटेर भाग्दैगर्दा एमाले नेता पक्राउ परेको र पार्टी नेताको आदेशमा लुटपाट गरिएको भन्दै पोस्ट गरिएको सामग्री भ्रामक छ ।  जेठ २०८१ मा सुनसरीमा भएको पक्राउको घटनालाई भ्रामक तरिकाले प्रधानमन्त्री केपी शर्मा ओली र उनको पार्टीसँग जोड्दै सामाजिक संजालमा फैलाइएको पाइयो । 

नतिजा : भ्रामक

हाम्रा स्रोतहरू

समाचार, himalkhabar.com
तस्बिर र समाचार, english.khabarhub.com

तपाईँले थाहा पाउनु भएको कुनै शंकास्पद खबर वा सूचनाबारे तथ्यजाँच, अनुसन्धान वा अन्य सुझावको लागि हामीलाई [email protected] मा इमेल गर्नुसक्नुहुनेछ अथवा हामीलाई 9999499044 नम्बरमा ह्वाट्सएप गर्नुहोस् । हामीलाई सम्पर्क गर्न तपाईं सम्पर्क पेजमा गएरसमेत फारम भर्न सक्नुहुनेछ ।